آغ آتيم ، قول قاناتيم
یازار : ايگيد
+0 به يه ن
آغ آتيم ، قول قاناتيم
آت قدمين يورتمه يئري !
آش تپه لردن
سيلديريم تك سره لردن
سئله سينميش دره لردن
بو نه طوفاندي گؤزل كه ليگيمي
ايستير آييرسين فره لردن
غيرتيم جوشه گلير غملي خبردن
آغ آتيم – قورخما خطردن !
آغ آتيم قول ، قاناتيم ،
شيهه چك ، قوي سسيوه
بلكه ياتانلاردا اؤيانسين
ياتماغين واختي دگيل دورسون اوتانسين
ياتانين عؤمرو تالانسين
تازا نعلين وار آتيم
چال بو داغين سينه سينه ، قوي پارالانسين
چال داغين سينه سي باتسين ، يارالانسين
داشي داشدان ، آرالانسين
آغ آتيم قول قاناتيم
داش قايادان آشما چتيندي
قاباق اؤز يوققوشادي ، قاشما چتيندي
داغا ديرماشما چتيندي
داشا ، سووخاشما چتيندي
باخما يوللاري چتيندي
اورانين هئيبتي يوخدور
آغ آتيم همت ائله !
غيرتي يوخدور
هله اؤز يوققوشالار چوخدو قاباقدا
آشماق اولماز بو آياقدا
آغ آتيم قول قاناتيم
بسدي اياق ساخلاما ، گون باتدي قارالدي
گون گئچيب داغ دالينا رنگي سارالدي
داغين اوستون دومان آلدي
آغ آتيم ، بس بو نه حالدي؟
بورا يارقاندي آتيم دورما آماند.
آغ آتيم ، قول قاناتيم
آت قدم آيدينليغا ساري
هؤركوشن اوولاريلان
چيخ سره ياللاري يوخاري
قار قالان داغلارا سال بير نفسين
قوي اريسين بوز كيمي چئگينينده كي قاري
سولاري آرخلارا سال بلكه سووارسين
قوري قالميش اوبالاري
قوي بؤيوك گؤلده اؤزوشسونله
ياشيل باش سونالاري
آغ آتيم
جهد ائله باريسني تاري !
آغ آتيم ، قول قاناتيم
طبعيمين درياسي جوشقوندو
يئل اسدير لپه لنسين
قوي چاليم صخره لره دالغامي
دالغام سپه لنسين
قوي ياغيش تك قورويان
داغلارين اؤستونده اله نسين
هرزه اوتلاري آپارسين
لالا بيتسين
هامي گؤللر تزه لنسين
گؤلو بلبل يييه لنسين
آغ آتيم ، قول قاناتيم
آت قدمين قلعه ي بابكدن آشاق
قارا گونلن ساواشاق
آت گؤلوندن سس آتيب
بابكين حالين سوروشاق
يئنه طوفاندا جوشاق
دريالار تك قوووشاق
آغ آتيم ، قول قاناتيم
شيهه چك قوي سه سيوه
هاجرين تركينه چكسين نبي گلسين
قوي كور اوغلو آتيني داغلارا سالسين
ائشيديب شيهه ني گلسين
الده كسگين قيليجيلا
بوياسين قانه كئچل حمزه ني گلسين
قوي كرم سازيني سالسين دؤشونه
چؤللره دؤشسون
هاي سه سي ائللره دؤشسون
دئگيلن غملي كرم ايستر اگر ، اصليني گلسين
دشمنين بلكه كسه ك نسليني ، گلسين
قوي بو داغلاردا بؤيوك هلهله دوشسون
داغلارا ولوله دؤشسون !
آغ آتيم ، قول قاناتيم
منه بير قالغي بابامدان ، بو ورن ديلدي
بونو چئگنيمه ساللام
قاراداغ باشيني آللام
اورا بير ولوله ساللام
آغ آتيم دورما ، يوبانسان ، دالي قاللام
آغ آتيم ، قول قاناتيم
بيز اگر قلعه ي سيمرغ دان آشساق بيزه آزدي
باخما يوللار ناتارازدي
باخما بو قارلي دماوند
بو قفقاز بو هرازدي
باخما داغدا هاوا دوتقوندو ، آيازدي
باخما بو قيشدي بو يازدي
آغ آتيم آت قدمين دريا ، دايازدي
درياني گئچسن اگر شهرِ نيازدي
اوردا هر قان كي تؤكولدو يئره
آزادليقي يازدي
بشر آزادليغا بازدي !
آغ آتيم ، قول قاناتيم
اوردا دولبرچين اوتو دؤرت پَر آچيبدي
اوردا ديلله نمگه ديل تازه شيرين ديللر آچيبدي
اوردا باغلاردا بوتون گ,ل لر آچيبدي
آغ آتيم
آت قدم آيدينليغا ساري !
هوشنگ جعفري
عشق دئييل سن!
یازار : ايگيد
+0 به يه ن
قاراداغ
یازار : ايگيد
+0 به يه ن
قره داغ اهلي بيلير من نئجه ديوانه سي ام
بابكين داش قالاسي، هم نبي كاشانه سي ام
ايسته ديم بير كره ده سيره چئخام بو ماحالي
آيلارين هيجرانينا سون قويا بلكه وصالي
كونلومو چَن بورويوب دوغما دياردان آرالي
آخي من خان آرازين قان دولو پيمانه سي ام
قاراداغ اولكه سينين گور نئجه ديوانه سي ام
سئوميشم زيره سي قار سهراماني شاه داغئنين
باش بولاق اورتا قجللي قارالار يايلاغيني
مرد اگيت ميدانيني طُرفه گؤزل اويلاغيني
داغئني اصلانيني سئت قايادان لانه سي ام
قاراداغ اولكه سينين گور نئجه ديوانه سي ام
مني مفتون ائليين ورزقانين حيواسي دير
كيوانين آغ قيزيلي، مينجوانين بوغداسي دير
بير كليبر زغالي، بيرده اهر آلماسي دير
اوشتبين آغ نارينين قئرمزي شاهدانه سي ام
قاراداغ اولكه سينين گور نئجه ديوانه سي ام
بسله نيب تاي حضره هر قارا گوز قئز گليني
وئرمييب هر اوتن اغيار الينه پاك اليني
وئرمه رم يوز لادانه آي بنيزين بير تئليني
گول خانيم نازلي صنم گول پري، گول دانه سي ام
قاراداغ اولكه سينين گور نئجه ديوانه سي ام
بو ائلين صنعتينه،حكمتينه باش اوجادير
چون جوان عاشيق حسين تك اولو شاعر ياراديب
افتخاريم او مرام عاشيقي صنعت كاريدير
شاهدين داش اولان اوچ قارداشين افسانه سي ام
قاراداغ اولكه سينين گور نئجه ديوانه سي ام
ساي حساب سيز بيليرم كئچميشينين قهرماني
بير مثل چون او وطن خاديمي ستارخاني
نبي تك چوخدي بئله خان بيه، قان اود دوراني
عاشيقي هر تكي ام قرباني هر دانه سي ام
قاراداغ اولكه سينين گور نئجه ديوانه سي ام
شعر گنجينه سي دي اوستاد عاشيق مسكني دير
خزرين حجمي قدر فولكلوريندان غني دير
شاعرين الهامي گوم گوي چمني، گولشني دير
خان چوپان قوشماسي نين اينجه سي دردانه سي ام
قاراداغ اولكه سينين گور نئجه ديوانه سي ام
صحبت آچديمسا دئيم تئللي سازين قدرتيني
مين كونول لر داشيير معنوي ائل ثروتيني
ميللته دئلغمي آتديقجا آنار قدرتيني
خان كرم مجليسينين غم ائوي غم خانه سي ام
قاراداغ اولكه سينين گور نئجه ديوانه سي ام
بير زمان باسقي ائديب شاهليق ائده نلر ائليمه
خور باخيب دير باياتي قوشما گارايلي ديليمه
او سببدن چكيليب غم سه گاهين زابليمه
بير شكسته قره باغ ماهني سنين زيل سسي ام
قاراداغ اولكه سينين گور نئجه ديوانه سي ام
دئيرم بيرده گوره يديم او گوزل چاغلاريني
تويلي بايراملي بوتون كندلي اولماغلاريني
بهمن افسون ائده ن نغمه لي يئغناغلاريني
مرادين چالديغي اول تئللي سازين شانه سي ام
قاراداغ اولكه سينين گور نئجه ديوانه سي ام
خالقينا ائتسه ستم ظاليم آغير گون گوزاران
عكس ائدر ماهني سينا شعرينه نفرتله اينان
ارتجاع ريشه سينه اودلي قلم ضربه ووران
ستارين سرمايه شعرينده كي تازيانه سي ام
قاراداغ اولكه سينين گور نئجه ديوانه سي ام
دينله اشعاريمي اي خالقلارا ظلمت توره دن
ايسته يب هر بير عوام خلسه ساياق عقلي گؤده ن
بابكين اولكه سينه سورسه خلافت يئني دن
شمشيره ال آپاران شاعره مردانه سي ام
قاراداغ اولكه سينين گور نئجه ديوانه سي ام
شعر از: محمد گل محمدي
آذربايجان
یازار : ايگيد
+0 به يه ن
آذربـــايجـــان
آذر بـايجان باهـاريم سـان يـازيــم ســان
آتـام سنـسـن آنـام سنـسـن نـازيــم ســان
گونول لرده ، سوزدانــيشان ســازيــم ســان
سـنسـيز اولمازياشـايـشيـن قايـداسي
چـاليـشـمـاغيـن الـشـمـاغين فايداسي
آذربايجان
یازار : ايگيد
+0 به يه ن
كونلوم قوشو قاناد چالماز سنسيز بيرآن,آذربايجان
خوش گونلرين گئتمير مودام خياليمدان,آذربايجان
سندن اوزاق دوشسم ده من عشقين ايله ياشاييرام,
يارالانميش قلبيم كيمي,قلبي ويران آذربايجان
بوتون دونيا بيلير سنين قودرتينله,دوولتينله
آباد اولوب,آزاد اولوب مولكي ايران,آذربايجان
بيسوتوني اينقيلابدا,شيرين-وطن اوچون فرهاد
كولونگ وورميش اوز باشينا,زامان-زامان,آذربايجان
وطن عشقي مكتبينده جان وئرمگي اويرنميشيك,
اوستاديميز دئييب هئچدير وطنسيز جان,آذربايجان
قورتارماك چون ظاليملرين اليندن رئي شومشاديني,
اوز شومشادين باشدان-باشا اولوب آل قان,آذربايجان
يا رب,ندير بير بو قدر اوركلري قان ائتمگين,
قولو باغلي قالاجاقدير نه واختاجان,آذربايجان؟
ايگيدلرين ايران اوچون شهيد اولوب,عوضينه
درد آلميسان,غم آلميسان سن ايراندان,آذربايجان
اوولادلارين نه واختا دك تركي-وطن اولاجاقدير؟
دور آياغا,يا آزاد اول,ياتامام يان,آذربايجان
شهريارين اورييده سنين كي تك ياراليدير
آزادليقدير منه ملحم,سنه درمان,آذربايجان